ಆಶಾ ಕಾರ್ಯಕರ್ತರು ಸೇರಿದಂತೆ ಎಲ್ಲರನ್ನು ಕಾರ್ಮಿಕರೆಂದು ಗುರುತಿಸಲು.ಕೇಂದ್ರ ಸಚಿವರಿಗೆ ಪತ್ರ ಬರೆದ ಸಚಿವ ವಿ ಶಿವನ್‍ಕುಟ್ಟಿ

ತಿರುವನಂತಪುರಂ: ಕೇಂದ್ರ ಕಾರ್ಮಿಕ ಕಾನೂನುಗಳ ಪ್ರಕಾರ ಸ್ಕೀಮ್ ಕಾರ್ಮಿಕರಿಗೆ ಪೂರ್ಣ ಪ್ರಮಾಣದ ಕೆಲಸಗಾರ ಸ್ಥಾನಮಾನ ನೀಡಬೇಕು ಎಂದು ಕಾರ್ಮಿಕ ಸಚಿವ ವಿ. ಶಿವನ್‍ಕುಟ್ಟಿ ಹೇಳಿದ್ದಾರೆ..

ಕೇಂದ್ರ ಸಚಿವ ಮನ್ಸುಖ್ ಮಾಂಡವ್ಯ ರಿಗೆ ಬರೆದ ಪತ್ರದಲ್ಲಿ, ಅಂಗನವಾಡಿ ಕಾರ್ಯಕರ್ತೆಯರು, ಆಶಾ ಕಾರ್ಯಕರ್ತೆಯರು, ಮಧ್ಯಾಹ್ನದ ಬಿಸಿಯೂಟ ಕಾರ್ಯಕರ್ತೆಯರು ಮತ್ತು ಇತರ ಯೋಜನೆ ಆಧಾರಿತ ಕಾರ್ಮಿಕರಿಗೆ ಅವರ ಹಕ್ಕುಗಳನ್ನು ನೀಡಬೇಕೆಂದು ಸಚಿವರು ಒತ್ತಾಯಿಸಿದರು.

ಕನಿಷ್ಠ ವೇತನ, ಭವಿಷ್ಯ ನಿಧಿ, ಪಿಂಚಣಿ, ಹೆರಿಗೆ ಸೌಲಭ್ಯಗಳು, ಇಪಿಎಫ್ ಕಾಯ್ದೆ, ಇಎಸ್‍ಐ ಕಾಯ್ದೆ ಮುಂತಾದ ಕಾನೂನುಗಳ ಅಡಿಯಲ್ಲಿ ಕಾರ್ಮಿಕರಿಗೆ ಇತರ ಹಕ್ಕುಗಳನ್ನು ನೀಡಬೇಕು.

ಕೆಲಸದ ಸ್ವರೂಪವನ್ನು ಪರಿಗಣಿಸಿ, ಆಶಾ ಸಿಬ್ಬಂದಿಗಳನ್ನು ಪೂರ್ಣ ಸೇವಾ ಸೌಲಭ್ಯಗಳೊಂದಿಗೆ ಖಾಯಂ ಉದ್ಯೋಗಿಗಳಾಗಿ ಸೇರಿಸಲು ಒಂದು ರಚನಾತ್ಮಕ ಚೌಕಟ್ಟನ್ನು ರಚಿಸಬೇಕು.

ಈ ನಿಟ್ಟಿನಲ್ಲಿ ನೀತಿ ರೂಪಿಸಲು ಕೇಂದ್ರ ಸರ್ಕಾರ, ರಾಜ್ಯ ಸರ್ಕಾರಗಳು ಮತ್ತು ಕಾರ್ಮಿಕ ಸಂಘಟನೆಗಳ ಪ್ರತಿನಿಧಿಗಳನ್ನು ಒಳಗೊಂಡ ಸಮಿತಿಯನ್ನು ರಚಿಸಬೇಕು.

ಕಾರ್ಮಿಕ ಹಕ್ಕುಗಳು ಮತ್ತು ಸಾಮಾಜಿಕ ನ್ಯಾಯಕ್ಕೆ ಕೇರಳದ ಬದ್ಧತೆಯನ್ನು ಪುನರುಚ್ಚರಿಸಿದ ಸಚಿವ ವಿ. ಶಿವನ್‍ಕುಟ್ಟಿ, ಈ ದೀರ್ಘಕಾಲದ ಸಮಸ್ಯೆಯನ್ನು ಪರಿಹರಿಸಲು ಕೇಂದ್ರ ಸರ್ಕಾರ ತುರ್ತು ಕ್ರಮಗಳನ್ನು ತೆಗೆದುಕೊಳ್ಳಬೇಕೆಂದು ಒತ್ತಾಯಿಸಿದರು.

ರಾಷ್ಟ್ರವ್ಯಾಪಿ ಅನುಷ್ಠಾನಕ್ಕಾಗಿ ಮಾದರಿ ನೀತಿಯನ್ನು ಅಭಿವೃದ್ಧಿಪಡಿಸಲು ಕೇಂದ್ರದೊಂದಿಗೆ ಸಹಕರಿಸಲು ಕೇರಳದ ಇಚ್ಛೆಯನ್ನು ಅವರು ವ್ಯಕ್ತಪಡಿಸಿರುವರು.

ದೇಶದ ಯೋಗಕ್ಷೇಮಕ್ಕೆ ಸ್ಕೀಮ್ ಕಾರ್ಮಿಕರು ಒದಗಿಸುವ ಸೇವೆಗಳು ಅತ್ಯಗತ್ಯ. ಈ ಐತಿಹಾಸಿಕ ಅನ್ಯಾಯವನ್ನು ಕೊನೆಗಾಣಿಸುವ ಮತ್ತು ಅವರನ್ನು ಕಾನೂನು ರಕ್ಷಣೆ ಮತ್ತು ಸವಲತ್ತುಗಳೊಂದಿಗೆ ಪೂರ್ಣ ಪ್ರಮಾಣದ ಕೆಲಸಗಾರರನ್ನಾಗಿ ಗುರುತಿಸುವ ಸಮಯ ಬಂದಿದೆ ಎಂದು ಸಚಿವ ವಿ ಶಿವನ್‍ಕುಟ್ಟಿ ಪತ್ರದಲ್ಲಿ ಗಮನಸೆಳೆದಿದ್ದಾರೆ.