ಪ್ರಖರ ಬೆಳಕು ಹಾಯಿಸಿ ಮೀನುಗಾರಿಕೆ-ಎರಡು ದೋಣಿಗಳು ವಶಕ್ಕೆ, ದಂಡ

ಕಾಸರಗೋಡು: ಆಳ ಸಮುದ್ರದಲ್ಲಿ ಪ್ರಖರ ಬೆಳಕು ಹಾಯಿಸಿ ಮೀನುಗಾರಿಕೆ ನಡೆಸುತ್ತಿದ್ದ ಎರಡು ಮೀನುಗಾರಿಕಾ ಬೋಟುಗಳನ್ನು ಕೇರಳ ಮೀನುಗಾರಿಕಾ ಇಲಾಖೆ, ಮರೈನ್ ಎನ್ಫೋರ್ಸ್ ಮೆಂಟ್, ಕರಾವಳಿ ಪೊಲೀಸ್ ಜಂಟಿ ಕಾರ್ಯಾಚರಣೆ ನಡೆಸಿ ವಶಕ್ಕೆ ತೆಗೆದುಕೊಂಡಿದೆ. ಕಾಸರಗೋಡು ಕಡಲ ತೀರದಿಂದ 12ನಾಟಿಕಲ್ ಮೈಲು ದೂರದಲ್ಲಿ ಅತಿ ತೀವ್ರ ಬೆಳಕು ಹಾಯಿಸಿ ಮೀನುಗಾರಿಕೆ ನಡೆಸುತ್ತಿದ್ದ ಸಂದರ್ಭ ಕಾರ್ಯಾಚರಣೆ ನಡೆಸಲಾಗಿದೆ.  ಕೇರಳ ಮೀನುಗಾರಿಕಾ ನಿಯಂತ್ರಣ ಕಾನೂನು ಉಲ್ಲಂಘನೆಯ ಅಪರಾಧದದನ್ವಯ  ಬೋಟು ವಶ ಪಡಿಸಲಾಗಿದೆ. ನಂತರ ಎರಡು ಬೋಟುಗಳಿಗೆ ಐದು ಲಕ್ಷ ರೂ ದಂಡ ವಸೂಲಿ ಮಾಡಲಾಯಿತು.

ಆಳ ಸಮುದ್ರದಲ್ಲಿ ಅತಿ ಬೆಳಕು ಹಾಯಿಸಿದಾಗ ಮೀನು ಗುಂಪಾಗಿ ಬೆಳಕಿದ್ದೆಡೆ ಸೇರುತ್ತಿವೆ. ಇದನ್ನು ಬಲೆಹಾಕಿ ಸಂಗ್ರಹಿಸಲಾಗುತ್ತದೆ.  ಈ ರೀತಿಯ ಮೀನುಗಾರಿಕೆಯನ್ನು ಕೇಂದ್ರ, ರಾಜ್ಯ ಸರ್ಕಾರ ಈಗಾಗಲೇ ನಿಷೇಧಿಸಿವೆ. 12ವಾಟ್ಸ್ ಗಿಂತ ಕೆಳಗಿನ ಬೆಳಕಿನಲ್ಲಿ ಮಾತ್ರವೇ ಮೀನುಗಾರಿಕೆ ನಡೆಸಬೇಕಾಗಿದ್ದರೂ, ಇತರ ರಾಜ್ಯಗಳ ಕೆಲವು ಬೋಟುಗಳು ಸ್ಥಳೀಯರನ್ನು ಬಳಸಿಕೊಂಡು 5ಸಾವಿರ ವಾಟ್ಸ್‍ನ ಪ್ರಖರ ಬೆಳಕು ಹಾಯಿಸಿ ಮೀನುಗಾರಿಕೆ ನಡೆಸುತ್ತಿದೆ.