ಕಿರಣ್ ರಿಜಿಜು 9 ರಂದು ಕೇರಳಕ್ಕೆ

ನವದೆಹಲಿ: ಐತಿಹಾಸಿಕ ವಕ್ಫ್ ತಿದ್ದುಪಡಿ ಮಸೂದೆ ಸಂಸತ್ತಿನಲ್ಲಿ ಅಂಗೀಕಾರವಾದ ನಂತರ ಕೇಂದ್ರ ಅಲ್ಪಸಂಖ್ಯಾತ ವ್ಯವಹಾರಗಳ ಸಚಿವ ಕಿರಣ್ ರಿಜಿಜು ಅವರು ಅಭಿನಂದನಾ ಸಮಾರಂಭಕ್ಕೆ ಕೇರಳಕ್ಕೆ ಆಗಮಿಸಲಿದ್ದಾರೆ. 

ಅವರು ಈ ತಿಂಗಳ 9 ರಂದು ಎನ್‍ಡಿಎ ಆಯೋಜಿಸಿರುವ ಅಭಿನಂದನಾ ಸಭೆಯಲ್ಲಿ ಭಾಗವಹಿಸಲಿದ್ದು, ಮುನಂಬಮ್ ಜನರನ್ನು ಉದ್ದೇಶಿಸಿ ಸಚಿವರು ಮಾತನಾಡಲಿದ್ದಾರೆ.

ವಕ್ಫ್ ಅತಿಕ್ರಮಣದ ವಿರುದ್ಧ ಮುನಂಬಮ್ ಜನರು ನಡೆಸಿದ ಹೋರಾಟ ದೇಶಾದ್ಯಂತ ಚರ್ಚೆಯ ವಿಷಯವಾಗಿತ್ತು. ಸಂಸತ್ತಿನ ಉಭಯ ಸದನಗಳಲ್ಲಿ ವಕ್ಫ್ ಕಾಯ್ದೆ ತಿದ್ದುಪಡಿ ಮಸೂದೆಯನ್ನು ಮಂಡಿಸುತ್ತಾ, ಕೇಂದ್ರ ಸರ್ಕಾರವು ಮೊದಲು ಮತ್ತು ಮುಖ್ಯವಾಗಿ ಜನರೊಂದಿಗೆ ಇದೆ ಎಂದು ರಿಜಿಜು ಸ್ಪಷ್ಟಪಡಿಸಿದ್ದರು. ಮುನಂಬಮ್ ಜನರ ಸಮಸ್ಯೆಗಳಿಗೆ ವಕ್ಫ್ ತಿದ್ದುಪಡಿ ಮಸೂದೆ ಪರಿಹಾರವಾಗಿದೆ ಎಂದು ಅವರು ಗಮನಸೆಳೆದಿದ್ದರು. ಕೇಂದ್ರ ಸಚಿವರಾದ ಸುರೇಶ್ ಗೋಪಿ, ಜಾರ್ಜ್ ಕುರಿಯನ್, ಬಿಜೆಪಿ ರಾಜ್ಯಾಧ್ಯಕ್ಷ ರಾಜೀವ್ ಚಂದ್ರಶೇಖರ್, ಬಿಡಿಜೆಎಸ್ ಅಧ್ಯಕ್ಷ ತುಷಾರ್ ವೆಳ್ಳಾಪ್ಪಳ್ಳಿ ಮತ್ತು ಇತರ ಎನ್‍ಡಿಎ ನಾಯಕರು ಸಚಿವರೊಂದಿಗೆ ಇರಲಿದ್ದಾರೆ.

ಮುನಂಬಮ್‍ನಲ್ಲಿ ಸುಮಾರು ಆರುನೂರು ಕುಟುಂಬಗಳು ವಕ್ಫ್ ಕಾಯ್ದೆಯಡಿ ಭೂಮಿ ಕಳಕೊಳ್ಳುವ ಬೆದರಿಕೆಯನ್ನು ಎದುರಿಸುತ್ತಿವೆ. ವಕ್ಫ್ ತಿದ್ದುಪಡಿ ಮಸೂದೆಯನ್ನು ಪರಿಶೀಲಿಸುತ್ತಿರುವ ಜಂಟಿ ಸಂಸದೀಯ ಸಮಿತಿಯ ಮುಂದೆ ಮುನಂಬಂನ ಜನರು ಅರ್ಜಿಯನ್ನೂ ಸಲ್ಲಿಸಿದ್ದರು. ಮುನಂಬಮ್ ಸಮಸ್ಯೆಯನ್ನು ಪರಿಹರಿಸಲು ಮಸೂದೆಯನ್ನು ಬೆಂಬಲಿಸಲು ಕೇರಳ ಸಂಸದರು ಒಗ್ಗೂಡಬೇಕೆಂದು ಕೆಸಿಬಿಸಿ ಮತ್ತು ಸಿಬಿಸಿಐ ಸೇರಿದಂತೆ ವಿವಿಧ ಕ್ರಿಶ್ಚಿಯನ್ ಸಂಘಟನೆಗಳು ವಿನಂತಿಸಿದ್ದರೂ, ಕೇರಳದ ಎಡ ಮತ್ತು ಬಲ ರಂಗಗಳು ಇದಕ್ಕೆ ಬೆನ್ನು ತೋರಿಸಿವೆ. ಕೆಸಿಬಿಸಿ ಹೇಳಿಕೆಯನ್ನು ಸ್ವಾಗತಿಸಿದ ಮೊದಲ ಕೇಂದ್ರ ಸಚಿವರಲ್ಲಿ ರಿಜಿಜು ಒಬ್ಬರು.

ಕೇಂದ್ರ ಸಚಿವ ಸುರೇಶ್ ಗೋಪಿ ಹೊರತುಪಡಿಸಿ ಕೇರಳದ ಯಾವುದೇ ಲೋಕಸಭಾ ಸದಸ್ಯರು ಮಸೂದೆಯನ್ನು ಬೆಂಬಲಿಸಲಿಲ್ಲ. ಎಡ ಮತ್ತು ಬಲಪಂಥೀಯ ಸಂಸದರು ಈ ಮಸೂದೆಯನ್ನು ಸರ್ವಾನುಮತದಿಂದ ವಿರೋಧಿಸಿದರು. ಅವರು ಮಸೂದೆ ಮುಸ್ಲಿಂ ವಿರೋಧಿ ಎಂದು ಬೊಟ್ಟುಮಾಡಿದರು. 

ಲೋಕಸಭೆಯಲ್ಲಿ ಮಸೂದೆ ಅಂಗೀಕಾರವಾದ ನಂತರ ಕೇಂದ್ರ ಸರ್ಕಾರವನ್ನು ಅಭಿನಂದಿಸಲು ಗುರುವಾರ ಬೆಳಗಿನ ಜಾವ 2 ಗಂಟೆಗೆ ಜನರು ಮೆರವಣಿಗೆ ನಡೆಸಿದರು. ಇದು ದೇಶಾದ್ಯಂತ ಚರ್ಚೆಯಾಯಿತು. ಇದು ರಾಷ್ಟ್ರೀಯ ಮಾಧ್ಯಮಗಳಲ್ಲಿ ದೊಡ್ಡ ಸುದ್ದಿಯೂ ಆಯಿತು. ಕೇರಳದ ಎಡ ಮತ್ತು ಬಲಪಂಥೀಯ ಸಂಸದರು ರಾಜ್ಯಸಭೆಯಲ್ಲಿ ಮಸೂದೆಯ ವಿರುದ್ಧ ನಿಲುವು ತೆಗೆದುಕೊಂಡರು. ಲೋಕಸಭೆಯಲ್ಲಿದ್ದ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಮತ್ತು ರಾಜ್ಯಸಭೆಯಲ್ಲಿದ್ದ ಸೋನಿಯಾ ಗಾಂಧಿ ಚರ್ಚೆಯಲ್ಲೂ ಭಾಗವಹಿಸಲಿಲ್ಲ. ಪ್ರಿಯಾಂಕಾ ವಾದ್ರಾ ಅವರಿಗೆ ಪಕ್ಷದ ವಿಪ್ ನೀಡಲಾಗಿದ್ದರೂ ಅವರು ಸದನಕ್ಕೆ ಹಾಜರಾಗಲಿಲ್ಲ.